Badaukagu e-maila, e-bookak, e-administrazioak... eta e-makume ugari eta potenteak ere bai. Baina albiste gutxi ikusten da emakume informatikarien lan oparoaren berri emateko. Horregatik ekarpen horiek Itzaletik argira eramateko ahalegin bat egingo dugu gaur EHUn.
Donostiako Informatika Fakultateko (DIFeko) albisteen difusioaz aritzen den DIFusi@ blogean zabaldu da gaurko ekitaldiaren berri:
Emakumeen nazioarteko eguna dator eta UPV/EHUk Informatika Fakultatea aukeratu du bere ekitaldia egiteko. Euskal Herriko Unibertsitateak urtero ospatzen du martxoaren 8a, baina aurten larunbata izango denez, martxoaren 7ra aurreratu da ekitaldia. Fakultatean hainbat erakusketa eta jarduera ari dira aurrera eramaten, eta horretan e-makumeak taldeak hartu du gidaritza.
Jardueren adibide gisa honakoak:
- emakume informatikarien foto-mosaikoa
- Erakusketa fakultateko hallean: e-makume aitzindariak
Jarduerez gain martxoaren 7ko ekitaldiak berak ere badu interesik:
- 10:30etan Ekitaldi akademikoa
- 12:00etan Bertso-trama: Bitetik bytera, istoriotik historiara
Maialen Lujanbio eta Aitor Sarriegi bertsolariak
eta Aitzol Astigarraga gai-jartzailea
Ekitaldiaren programa osoa esteka jarraituz ikusi ahal izango duzue.