Euskal Herria, munduan liburu gehien argitaratzen duten herrialdeen artean

International Publishers erakundeak euren urteroko txostena (ikusi PDFa) argitaratu du, 2013an munduan zehar argitaratutako liburuen laburpenarekin. Besteak beste, 40 herrialdetan argitaratu diren liburuen laburpena egin dute. Liburu gehien argitaratu zuen estatua Txina izan zen (440.000 titulu ezberdin); biztanle kopurua kontuan hartuta, ostera, Erresuma Batua da gehien argitaratzen duena (2875 nobedade milioi bat biztanleko). Eta euskarazko ekoizpena aztertuko bagenu? Non legoke Euskal Herria?

Hemen daukazue Nazioarteko Editoreen Elkarteak (International Publishers) emandako datuen laburpena (txosten osoa PDF honetan). Liburu gehien argitaratu dituzten estatuen artean, aurreneko 2 postuetan herrialde erraldoiak daude: Txina (440.000) eta Estatu Batuak (304.912), liburu berriak eta berrargitalpenak kontuan hartuta. Hirugarren postuan Erresuma Batua dago (184.000), Europako herrialdeen artean aurrenekoa. Bere atzetik datoz munduko beste herrialde aberatsenetako batzuk, Errusia, Alemania eta Japonia; eta juxtu euren atzetik Espainia (76.000 titulu) eta Frantzia (66.000). 

Liburu-ekoizpena biztanle kopuruaren arabera aztertzen badugu, ordea, eta nobedadeak bakarrik aztertuta, zerrenda asko aldatzen da. Zerrendako lehenengo postuetan, batez, ere, herrialde exportatzaileak daude, Erresuma Batua (2875 nobedade milioi bat biztanleko), Taiwan (1831) eta Espainia (1626), zeintzuek euren produkzioaren zati handi bat kanpoan saltzen duten. Baina herrialde txiki batzuk ere indartsu azaltzen dira, adibidez, Eslovenia, Txekiar Errepublika, Georgia eta Norvegia. Estatu Batuak, aldiz, 12. postura jaisten da, eta Txina 25.era. 

Titulu berriak milioi bat biztanleko

Harrigarria da, hala ere, zerrenda horretan Islandia ez azaltzea, ziurrenik munduan gehien idazten eta irakurtzen duen herria. Urtero 1000 liburu berri inguru argitaratzen ditu, 320.000 biztanle izanik. Hortaz, gutxi gorabehera 3000 nobedade argitaratzen dituzte miloi bat biztanleko, aurreko guztiek baino gehiago.

Eta Euskal Herria?

Eta Euskal Herria? Non legoke euskarazko produkzioa? Euskal Herrian orotara argitaratzen diren liburuen kopurua lortzea ez da hain erraza, baina euskarazkoa urtero neurtzen du Jakinek. 2008a izan zen historiako onena, baina harrezkero jaitsi egin da liburu-ekoizpena (gora-beherekin). Hala ere, urtero 2000 liburutik gora argitaratzen dira euskaraz, gehienak nobedadeak. 

Gutxi? Asko? Beste herrialdeetan bezala, biztanleen araberako datuak ateratzen baditugu**, eta 2012ko datuak kontuan hartuta, emaitza argigarriagoa da:

Urteroko argitalpen berriak milioi bat biztanleko