Oroibidea, Nafarroako gerra zibileko eta frankismok biktimen artxibo digitala, izan da 2025eko Interneteko Argia Saria jaso duena, gaur egin den euskal komunikazioaren ospakizun honetan, Argia Sarietan. Nafarroako Gobernuaren ekimena da Oroibidea, Nafarroako Memoriaren Institituak kudeatzen du, 2020an sortu zen eta webgune gisa eguneratu zen 2024ko apirilean, beste iturri batzuetako datuen integrazioarekin.
Oroibideak errepresaliatuen 23.000 erreferentzia baino gehiago jasota ditu. Proiektuak Nafarroako ondare memorialista babestu eta zabaldu nahi du, frankismoaren biktimei buruzko testigantzak, dokumentuak eta datuak eskuratuz, eta arreta berezia jarriz hainbat errepresio motatan. Errepresio lekuen (hilobiak nahiz espetxeak) araberako bilaketak egitea dago; goiko irudian eta esteka honetan duzue hobien maparen bista bat.
36. Argia Sariak dira 2025eko hauek, Usurbilgo Atxega Jauregian elkartu dira Argiakoak, sarituak eta laguna. Oroibideak Interneteko saria jaso duenean, Nafarroako Memoriaren Institutuaren izenean Cesar Layana eta Josemi Gastonek eskertu dute ohorea:
Interneteko Argia Sarien zerrenda
Hona aurreko urteetan Interneteko Argia Saria jaso duten ekimenen zerrenda:
- 2024: Donostiako Egia auzoko Gordegia, eta bere artxibatze ekimena.
- 2023: Mastodoneko komunitate euskalduna.
- 2022: Badok.eus, Berriaren musika ataria.
- 2021: Ikus-entzunezko euskaratuak partekatzeko Euskal Encodings.
- 2020: Egunean Behin joko/aplikazioa, CodeSyntax-ek sortua.
- 2019: Berria egunkariaren indarkeria matxistaren biktimen mapa.
- 2018: Txantxangorria.eus, Gabi de La Mazaren karaokeak.
- 2017: Game Erauntsia.
- 2016: Azpitituluak.com gaur egunean .eus
- 2015: Ipar Euskal Herriko 2014ko udal bozak elkarlanean jarraitu zituzten hedabideei emana.
- 2014: Topatu.info
- 2013: Dantzan.com eta Bertsoa.com, gaur egunean biak .eus
2012a arte, Sareko Argia saria esaten zitzaion ohore honi. Hauetxek jaso zuten izen horrekin:
- 2012: EITB Nahieran.
- 2011: Ahotsak
- 2010: Grebaorokorra.info
- 2009: Librezale
- 2008: Euskarazko Wikipedia
- 2007: IKTeroak
- 2006: Gaztesarea
- 2005: Uztarria
- 2004: Susa
- 2003: Sustatu (gure txanda hauxe izan zen!)
- 2002: Zientzia.net
- 2001: Irratia.com
- 2000: Eibar.ORG
- 1999: Kaixo.com